شبكة حجر قدّوْه للمعلومات في سلسلة فضائح وطرائف عصابة النظام
أمريكيا عبدالحميد إبراهيم – الدوحة – فاشر السلطان “شبكة حجر قدّوْه”
49 فكي “حوالينا وما علينا” و جوز اللوح “تيوس ماعز”
خمسة كيلو حجابات وورق وكمان حجاب مدرعة من زمن شيخ بحر .. كتبوا في رمضان وجلّدوا ودسوا فوقو سلكاي نحاس .. وكْرَبوا مِنْ وَسُطْ بي خيطاي أحمر”
كاشا جنجويد وكنْ جَمَاعة كَبسوا .. داك شُغُلْ مِنْ بعيدْ لبعيد
في كل يوم نسمع حكاوي وغرائب عصابة نظام الإبادة الجماعية ولكن دي واحدة من المضحكات المبكيات ومن بيت الكلاوي .. يوسف عثمان كبر “الماسورة” دجال وحرامي محترف وماننسي براعته في التملق والدهلسة وطق الحنك حتي صار مسيلمة دارفور المتفنن في الكذب وصاحب المقولة الشهيرة “شدرة ده عطشان يا جماعة أزقوا .. وبلميكم من حراي شمس .. تصّوتْ للديك حقك عييك”.
أفادت تسريبات شبكة حجر قدّوْه المعلوماتيه “علي غرار ويكي ليكس” في تصرف غير مستغرب وأبان إنتشار قوات حركة العدل والمساواة في شمال دارفور قام المدعو كبر ماسورة بالجقلبة والهضربة وغلبو النوم من الهواجس .. وفي إجتماع أمني عالي المستوي همس في أذني زولنا رجالات الأمن بالفاشر وقال أحدهم “يا أخوي وليدات د. خليل ديل جاينك عديل وسليمان صندل شايل معاهو حبل علشان يكُربَكْ”.. إنتهي .. وبعدها دار الحوار التالي!!
كبر: جيش وينو؟
زبانية الأمن: دخلوا الغابة وحرنوا وقالوا أفوا ما بندواس أخوانا … وضباطهم بياكلوا منون “زلابية” في الميز
كبر: بوليس (كجر) وينو؟
زبانية الأمن: في .. إلا دواسهم ما بفش غبينة
كبر: قوات أمن وينو؟
زبانية الأمن: عيال مصارين بيض؟ في .. بس جماعة الخرطوم شالوا نصهم وقالوا ترعة أمدرمان ماكفاية
كبر: طيب أبوطيرة وحرس حدود؟؟؟
زبانية الأمن: في .. إلا تِلِتْ قروشهم أكلنا في سوق مواسير .. و تِلِتْ إنضموا لخليل .. وباقي تِلِتْ مزبزبين
عمك كبر دنقر للتراب وصنقع للسماء “وحك رأسو” وقال سواق وديني البيت.
وهنالك تم ترتيب إجتماع من نوع آخر 49 فكي مدنكلين (حاج صالح، فكي عبدالله، شيخ محمد أحمد …ألخ) بعدها شرح كبر ماسورة الوضع الخطير لمجلس ال49 فكي .. وأشار عليهم كتابة لوح “حوالينا وما علينا” وبذلك طلب المجلس تجهيز 49 تيس ماعز سود “جوز للوح” .. وذكر أحدهم “شغل ده كان قال كَنْ بوديهم حوالينا ..نيالا ولي غادي” نط كبر ماسورة وقال “ما مشكلة خلوهم يمشوا غادي غادي .. كاشا جنجويد وكنْ جَمَاعة كَبسوا .. داك شُغُلْ مِنْ بعيدْ لبعيد”.
ومن جهة أخري وفوق ده كلو “كبر ما سورة” عندو خمسة كيلو من الحجابات “السينجنجات” ويعتمد عليها في جميع تحركاته.. فهل ياتري قاعد يزود منها الريس عمر البشير وحيرانو لليوم الأسود؟؟