للوج مرش
للأستاذ /نقدالله خليل*
الوطني وقع منبرش
ابجيقا بطل الهرش
القال هو سمك القرش
والجاموس الما بنطرش
البطنو مليان فرش
يوم عشر كرشوهم كرش
~ ~ ~ ~ ~
البطر عقبه الدرش
والجربان بقى ينكرش
الغواني شكلهن نبش
والكدسة حقهم نفش
الترسانة راقد تبش
وأم در بعين الشمش
التورو خمشوها خمش
~ ~ ~ ~ ~
القزاز دا ليه يتهبش
أخونا المكنكش
القزاز دا ما عمل كش
~ ~ ~ ~ ~
ما شفتو يوم الكبس
والتورا يلحسوا لحس
الكدسة كبوا الجرس
وشعارهم للوج مرش
للكبري بقى ليهم ترس
~ ~ ~ ~ ~
الكدسة سيبوا النفش
كذب القالوا حشش
لو جمعتوا كل القش
وحفرتوا مليون إنش
والقصر عبيتوا في لنش
والكباري عملت كش
والهوو جاب الدش
وجماعته البياكلوا إش
في الجاية بتمش
الناس شنبهم وحش
واسكادرو تسد الشمش
~ ~ ~ ~ ~
يا الوطني تنسى يوم ولعت
وبعد الشمس ما طلعت
والجماعة هديرهم ملأت
والرعد براقه شلعت
وام در بالفأس انصلعت
وجنياتك فجأة إنهلعت
خيامهم من الدقشة إنقلعت
سريع للكاكي ما خلعت
وفي جوف أم در انبلعت
~ ~ ~ ~ ~
جاثكم هجمة مرتدة
مرتب ليها من مدة
وبخطوات ثابتة ممتدة
وبدت الجولة بامبده
وكت كترت زياراتكم
علينا الرد لابد
~ ~ ~ ~ ~
والشال الكرسي دا شده
وسد ليه مخدة
وخلف كرعيه واتمد
وحلف ما يسيبه ابدا
وكت جابت لها عضة
وأم در لونها إسود
خطف طيارتو وقد
مقضي العمرة في جده
ومعزوم في كنانة غدا
~ ~ ~ ~ ~
لزام التقيل الوحش
يا قائد لواء الطش
فجأك هجوم البحش
وفرر فرار الدحش
~ ~ ~ ~ ~
عجيب أمرك فلاي سوبر
تفر وتقنب تتبوبر
وبطولات وشتائم في الأوبر
وفلاحتك فضل في كوبر
~ ~ ~ ~ ~
فالحين في دق الطبل
ومكشاشتكو بلا حبل
فاكرنه سقي الإبل
ولا لعبة شد الحبل
الحرب شغل البل
والخسارة فيها دبل
~ ~ ~ ~ ~
وفي المحاكم جنس دروشه
التهم تملا الحشا
والادلة كلها وشا
في مطعم عزمهم عشا
وجا واحد بهني ومشا
ودرداقة شايلة دوشكا
والنهاية بقت هترشه
وقرارات جات حنفشة
~ ~ ~ ~ ~
الوطني بعد الدفس
جاتك مرض النفس
وقلبت المشكلة في لبس
المن ثماني هو في الحبس
~ ~ ~ ~ ~
يا الوطني وسع السكه
ومعاك أحزابك الفكه
دي سكه نهايتا الدكه
بلاش تختمها بالجكة
~ ~ ~ ~ ~
الوطني قوم بالليل
وخلف وراك كم ميل
قبال الذراع الطويل
يدخل نخرة الفيل
والصفار من قفاك يسيل
*الاستاذ نقد الله خليل
*امين الاستثمار وادارة الموارد بحركة العدل والمساواة السودانية