سلام السودان
معز عمر بخيت
3 أكتوبر 2020م
بالأحضان سلام يا نيل
بالأحضان تحية شوق
لبكرة جميل
بلد من غابة الأبنوس
ضفافو نخيل
سلام نبنيك يا سودان
بكل محبة
جيل ورا جيل
سلام في الدم مع الشريان
عفيف وأصيل..
شعار الثورة يتحقق
سلام حرية عدل أمان..
وحب للأرض يتعتق
من دارفور لام درمان
وفي كسلا وفي شيكان
وفي حلفا وحضارة نبتا
في شندي وكبوشية..
في مروي
وجنب جبل أم علي الشامخ
أهرامات حقيقية
جبال النوبة عزتنا
وفي بارا وخور طقت
معالم راسمة سكتنا
سلام للقادة بالتوقيع
سلام سودان جليل ورفيع
ومن اليوم ولي بكرة
شعارنا بناء
عداوة تموت
لا جبروت ولا بغضاء
أهلنا يعيشوا في نعمة
وفي حرية في إيمان
ونعرف قدرة الأوطان
وكيف تبقى البلد لوحة
تمجد قيمة الإنسان
لا بنزين نكوس ليه
ولا صف غاز
ولا طابور يفتش عبش
ولا متمرد يفتح نار
ولا عصيان في وحدة جيش
سلام للناس دعاة الحق
وللجابوا السلام زي برْق
يهل بالخير على ديارنا
بعد ما ضقنا ويل الحرْب
وماتوا صغار نساء ورجال
جنوب وشمال
وشرْق وغرْب
يا شهدانا يا ثوارنا
عين مفتوحة تحرسنا
ويد ممدودة للتعمير بتترسنا
ويا سودان
عريس السلم في الميدان
أصلك انت فارسنا
وربنا يحرسك من عين
ومن حاسد ومن نفاث
ومن عمل الشقي وفتنة
حماك المولى ما تشوف شر
تضوق العافية تتفجر
جمال شايل ملامحنا
لا بفرقنا لون أخدر
ولا أبيض ولا أسمر
ولا أعراق ولا سحنة.
معز عمر بخيت