بسم الله الرحمن الرحيم
ديل شنو ( الجزيرة ــ القرضاوى ــ عزمى بشارة)
ثورات إجتاحت الانظمة العربية التى ما عملت يوما لشعبها ولاصدقت يوما فى حكمها لان القائمين على أمور عباد الله تناسوا بأن الله يمهل ولا يهمل فرغم إمكانيات القهر المتطور بشرا وآلة إستطاع جيل الالفية الثالثة أن يسطر لقرنه بعمل رائع ترك كل العروش تهتز وكل الرءوس تستعد للزيانة ، وزيانة الشباب اليومين ديل إمتازت بقلع النظام من دابرو ، كل حكامنا الاشاوس ما زالت تقارير مستشاريهم لا تريهم أحوال البؤس والشقاء التى تعيشها شعوبهم ، حكامنا أقلهم كنكشة فى الكرسى عشرين سنة وكل واحد عامل إستراتيجية خمسية وعشرية (والمصيبة متجددة دوما) وكلو كلام ورق والعيال بتكبر والعقول بتطور والمعرفة وأخواتها متوفرة حتى فى المحمول ………….. الخريجين ملو الشارع فى إنتظار المجهول، والبطالة كسرت أرباب الاسر ، والقبيلة صارت عماد السياسة وسلم المال والوجاها الكذابة فى كل الدول العربية ، والانتماء الى الوطن ما شغال بحاجة إسمها وجدان وحنين وبيت … شغالين بالحاكورة ( كما فى وطنى الحبيب) .
الظروف من حول الرئيس البشير وفقدانة لمساحات حركة خارجية ستجعله حتما فى وضع لا يحسد علية ، سياسة ما بترشح تانى للرئاسة وبقدم إستقالتى من المؤتمر الوطنى بقت دقة قديمة ولعب تلاتة ورقات الشعب يا ريس يريد الاتى :ـــ
1) تكوين حكومة إنتقالية تتولى شئوون البلد
2) وضع دستور يحترم آدمية الانسان ويستوعب تنوع البلد وما دايرين ترقيع لدستوركم الخلانا شعبين
3) محاسبة القتلة والحرامية السرقوا البلد
4) حل مليشيات النظام الفى الخرطوم ووسط البلد ودارفور
جلوسكم مع الامام الصادق والميرغنى ونقد ومجموعات الترابى وبقية الجماعة الصغار المردوفين ،كلهم والله لن يستطيعوا أن يوقفوا الزلزال الذى يبتلع كل القديم ، الاحزاب ما عادت قبلة تطلع يؤمها الشباب والمثقفين فهى عقيمة بدأ بهشاشة قادتها وهيافة برامجها بل وعدم موضوعيتها فى كل شئ ، جميعها لا تتيح فرصة الترقى لقيادتها فهى جزء من النكسة والانهيار وضياع البلد ، معركتك يا ريس مع الشباب الذى شاخ وهو فى العشرين ، فرص التوظيف مرتبطة بالوطنى نجاحك فى تجارتك مرتبطة بالوطنى كل شئ مرتبط بالانصياع والانحناء وبيع النخوه…. انحنا شباب عاوزين نغير حال البلد من المسير الدائم نحو الهاوية عاوزين صوتنا ينسمع …. الكسير وخراب البلد ما أخلاق ثورتنا واكنوبر وأبريل تشهد بذلك ، عاوزين نطلع موكب الكرامة يوم 15مارس ودا تاريخنا البخليتا نلحق شعوب العالم العاوزة تبني العقول والحقول … 15مارس هو يوم كرامة الخرطوم والنيلين والاسلامية والسودان والجزيرة والرباط والتقانة والازهري والاهلية والابيض والفاشر ونيالا ودنقلا وشندى والنيل الازرق وسنار وكسلا وبورسودان وكادوقلى ، أردنا الحياة فلا حائل بيننا وبينها ما دامت بيدنا …. ورسالة لحزب الابالسة حلاقة شبابنا ناشفة وفى الحر وجرستكم تتكلم بيها الجزيرة والقرضاوى وعزمى بشارة..
صديف أبوعمار
Msiddig [email protected]