خلونا نبدأ
حول شعار كل اللسلطة ليد الشعب
د. عوض عثمان محمد سعيد
ألمانيا / لايبزج
ما تخشـا كائن
ولا تخشى خائن
ولا زول مهادن
قول الحـقـيقـة
والله بيسـاعدك
والدرب باين
والنصر قرّب
* * *
الناس بتصبر
والناس بتسمع
وكمان بتعرف
ويمين تفِّـرز
مين المنافـق
مين البهادن
والإنتهازى.
الشعب عاوز
دايماً يصادم
وياخد حـقـوقو
بس وين الـببيِّن
دربوا وطريقوا؟!
إن كنت تعرف
وريهوا ليهوا!!
* * *
والله بعرف
دا الشعب لازم
ياخد المسائل
دايماً بإيدوا
وما يرجى كائن
بإسموا ماسـك
بعض الدفاتر
ومتخمى لاصق
فى كل الموائد
و عامل بفاوض
وخاليهوا بره
* * *
الشعب لازم
يكون محاذَّر.
ما يجيهوا زولاً
من فـوق متلِّب،
داير الكراسى،
يقعـد عليها
ويخدم مصالحوا.
تكبر كروشوا،
وتزيد قروشوا
* * *
الشعب لازم
طوالى يبدأ
ينِّظم صفوفوا.
يختارلجانوا
تنِّظم حياتوا
وتشُّوف مصالحوا.
الشعب لازم
يختار لجانوا
بإرادة حرة.
لى حى وقريه
وفي كل مدينة.
يختارعناصر
تقدر تناضل
وتصون حقوقوا
ويقيف وراها
بى كل قوة.
* * *
يا محمد أحمد
الحق ده حقك
تديهوا خائن؟؟
أوزول
مهادن؟؟
حاشاك وكلا..
* * *
ما قلنا نحنا
الشعب بعرف
مين البصادم
علشان حقوقوا
ومين البنافق
ومين البهادن
والإنتهازى.
* * *
بالله يلاّ
يلاّ... يلاّ
خلونا نبدأ
ونقلَّع حقوقنا.
فالدرب باين
والنصر قرّب
المانيا \ لايبزج
24.07.2005
د. عوض عثمان محمد سعيد