شبكة حجر قدّوْه للمعلومات في سلسلة فضائح وطرائف عصابة النظام

شبكة حجر قدّوْه للمعلومات  في سلسلة فضائح وطرائف عصابة النظام

عبدالحميد إبراهيم – أمريكيا – الخرطوم “سري للغاية”

تبيض قروشنا لزوم مصاريف الجنجويد .. وصافي النور جوه الجكْ

عميد م بضربة حظ يقبض عشرة مليون .. علي قولت (أنَفَعَ وإسِتنَفَعَ)

“أبو الرقباء” لزوم التوصيلة يلقف خمسة مليون

حجر قدّوْه جوه القَصُرْ الجمهوري .. ودغمسة القريشات من أمدرمان الوطني

أخونا السوداني منان قريبو شاتوا بره وبقي (عميد.م) وتعليم الوليدات في بلاد “الهند” هَدَه حيلو ودايرلو شوية دفره .. إلا الجيب مقدود والفلس حاصل .. أبوالوليدات صدفه قابل ليهو “دفعة” بالقصر الجمهوري .. وفي عشرة ونسة:

الدفعة: وين أراضيك ؟ والله زمن!

ابوالوليدات: أهو ده حالنا زي ماشايف وإنتوا ضاربين تراطيب القَصُرْ .. وهسع أوخوك مُعَصِلِّجَة معاهو ومزنوق في حبة قريشات.

الدفعة: ماتشيل هم بس عَدْي علي بُكرة والله يفرجها.

أبوالوليدات: مافي مشكلة .. مع السلامة – مع السلامة .. وعمك طول الليل عايش طابور قلق وتفاكير .. ياربي الشي شنو؟

باكر من النجمة أبوالوليدات كبس دفعتو في المكتب .. وعلي طول نبطشي جيب شاي ولا تشرب قهوة؟ .. وبعد شوية هي هي “ضحكة” وهوبْ ناولو ليك شيك بـ 900 مليون .. وبدون أي فرصة للتفكير أردف وقال ليهو “الرقيب السواق جاهز .. بس تمشي البنك وتصرفو .. وحقك 10 مليون وتجيب الباقي معاك” .. ” عمك – ياربي ده حق المُرسال لا شِنو؟ في سِرّو كِدَه” .. أبوالوليدات شقلب الشيك وكف لقط ليك (بنك أمدرمان الوطني – عمر حسن أحمد البشير صاحب الحساب) .. أبوالرقباء عارف سكتو تمام وحافظ الفلم كويس .. “ياربي سواها كم مرة!؟” .. العملية تمت في مكتب المدير .. وشنط الحديد فوق ضهر العربية .. (عودة) .. كراسي مكتب أبوالدفاع مليانة للحَلِقْ .. عبدالله علي صافي النور، حسبو محمد عبدالرحمن وقيادات الجنجويد مامخلين محل عِمَمْ مقنطرة ولبسات كنقولي وعصايات معاها شنط تَمَكنّا .. “أمسك الخشب دي شغلانة وكااااك تبيض قروشنا لزوم مصاريف الجنجويد .. وصافي النور جوه الجكْ”

أبوالوليدات حاول يحساب ويِسَلّمْ الشِنط ..!

الدفعة: ياخي ده كلام ده! أشوفك بُكره السواق حاينزلها لينا .. عمك رجع بيتو مبسوط خلاااص .. ويعالم الله من وراهو الحصل شِنو .. وفجأة ترررن التلفون .. الدفعة: ناقص 5 مليون .. عمك: ماعارف بس ممكن تسألوا السواق .. أتاري “أبو الرقباء” لزوم التوصيلة لقف ليهو خمسة مليون “رزق المساكين في المجرمين” ..  ولسع مسلسل أبوالتوج السايس بالفضائية القطرية  ونتابع!