عبدالواحد فى حديث الساعة

عبدالواحد فى حديث الساعة.
حاوره:عبدالحميد موسى بورو – كتبه ارباب جمعة يعقوب
اجرى سودان راديو سيرفس حوارا مع رئيس حركة تحرير السودان عبدالواحد محمد نور بمدينة نيروبى فى يوم الخميس الموافق الحادى والعشرون من الشهر الحالى وتم بثه على الهواء فى ذات اليوم.
واجابة عبدالواحد على اسئلة الخدمة الاذاعية الخاصة لدارفور من سودان راديو سيرفس  حول رؤية حركتهم لسلام دارفورالمنتظر، والوضع الراهن الذى يمربه السودان قبل انفصال الجنوب واستراتجيات الحركة للتحالف مع القوى السياسية الحزبية لاسقاط نظام البشير، وكيفية تكوين دولة المواطنة وهو يقول:-
*سلام دارفور يتم بتغيرالنظام وتسليم المجرمين للجنائية الدولية وسلام الدوحة هو المناصب ولا سودان بوجود المؤتمر الوطنى فى الحكم  .
*الحريات كلها تطلق وعلى الشعب السودانى الاستمرار فى التظاهر فى هذا الابريل ليكون ابريلين بدل ابريل واموال المؤتمر الوطنى يجرد ويسلم الشعب لتحسين اوضاعهم.
*المؤتمر الوطنى فاقد الشرعية كيف يستفتى اهل دارفور الذين أبادتهم؟ دة كلام فارغ.
*اجريت جولات مركوكية لدول مجلس الامن منها افريقية وقريبا جدا سيكون قرار فرض حظر الطيران فى دارفور, ولم انطرد من باريس وهذا عقلية المؤتمر الوطنى.
# المهم أن محور هذا الحوار بصورة او اخرى كان هو حزب المؤتمر الوطنى الحاكم فى السودان,فأن لم تبدأ الاسئله به فأن الاجابات تنتهى اليه ولعل مرد ذالك الى أن رئيس حركة تحرير السودان عبدالواحد نور يعول كثيرا على الشعب ولم يتردد أن يقول ،حركتنا يستمد القوة منهم ،وحتما ستلاحظون أن عبدالواحد لم يطول فى حديثه غير انه ينطق جملة حركة تحرير السودان.
*مرحبا بك رئيس حركة تحرير السودان عبدالواحد محمد نور بعد المظاهرة الخرج به السودانين فى مناطق مختلفة هناك خطاب منك موجهة للشعب ماهى اهم النقاط التى تضمنها هذا الخطاب؟
_ اولا أنا اود أن احيى جماهير الشعب السودانى أينما كانو وهذا هو مصدر قوتنا والهامنا ومصدر معاناتنا وصبرنا من اجل تغيرهذا النظام وبناء دولة المواطنة المتساوية والفصل الواضح للدين من الدولة اى الدولة الليبرالية الديمقراطية الالمانية ودة هو السبب الخلى شعبنا فى دارفور يدفع ثمن الحرية بمئات الالاف من القتلى والابادة والاغتصاب وملايين من النازحين واللاجئين وايضا شعبنا فى دولة جنوب السودان الدفع هذا الثمن بتاعت الحرية وشعبنا فى كجبار وفى الجزيرة وفى النيل الازرق وفى جبال النوبة وفى النيل الابيض وفى كردفان كلهم ديل دفعو ثمن الحرية, شعب السودان دفع ثمن الحرية لصالح العام والاسر الاتشردت وايضا الهاجرت للبلد لان الدولة اصبحت دولة لتظيم وهو تنظيم الجبهة الاسلامية المابمثل الا واحد او اقل فى المئة من الشعب السوداني,وامتلكو دولة واصبح شركة خاصة لهم, انا بناشد عبر اذاعتكم دة انو كل الشعب السودانى يخرجو وانحنا عندنا كل الاسلحة عندنا جيش حركة تحرير السودان العظيم البحارب فى الارض والان قريب جدا للوصول الى قلب العاصمة السودانية الخرطوم لتغير الوضع ,عندنا تانى اقوى سلاح وهو سلاح الشعب والمعروف انو الشعوب هو البغير, انحنا أبن لهذا الشعب حركة تحرير السودان هو حركة الشعب وبنبنى من الشعب ومن ابناء الشعب رجالا ونساء شبابا وشاباتا اذن انحنا نناشد كل الشعب وكل المدن انو المظاهرات تستمر الى يوم تغير النظام وتسليم البشير والمجرمين للمحكمة والمجرمين الاخرين نحاكمهم محاكمة محلية اذن رسالتى دة وجهت لكل الشعب السودانى وهذه الرسالة هى رسالة الشعب  والناس تانى ما تتوقف الجيش فى الارض ما تتوقف والناس فى كل مدن السودان فى كل قرى السودان يتظاهروا ويحتلو المدن لأن المدن مدن الشعب وليس مدن المؤتمر الوطنى والناس يقاومو, بعدين يقتلوكم ما حيقتلونا تانى اكتر من ما كتلو فى جنوب السودان او جبال النوبة او النيل الازرق او فى كردفان او شرق السودان او فى كجبار او فى النيل الابيض او فى الخرطوم او فى اى مكان, اذن هذا الشعب مطلوب منهم انو يخرجو ويستمروا ويشوفو الشعب السودان هو شعب اكتوبر وابريل وهذا الابريل كمان يكون ابريل للتغير عشان يكون عندنا ابريلين بدل ابريل واحد دة الرسالة انا بقدم للشعب السودانى واقول يأخ العزيز انحنا فى حركة تحرير السودان نستحق أن نقود هذا الشعب وانحنا ما نمثل ارادتهم لكن نقودهم الى تغير النظام دة وبعدين الشعب السودانى هم بختارو حكومتهم الانتقالية وايضا هما البختار حكومتهم الديمقراطية لكن انحنا قوة حركة تحرير السودان فى تغير النظام وبعدين لما نغير نسلم السلطة للشعب دة, الشعب يعمل حكومة انتقالية عشان يأكد لحكومة ديمقراطية لكن اهم النقاط بتاع الحكومة الانقالية دة قلنا انو نعمل حسن الجوار مع دولة جنوب السودان نعترف بيهم وتانى ما يكون فى حرب والناس يعيشو وفق مصلحة الشعبين ويكون فى أمن واستقرار وسلام حقيقى وثانيا أيضا انو هذه الحكومة مهمتها تعمل أمن فى دارفور ترجع الناس الى قراهم تديهم تعويضاتهم الفردية والجماعية ويحميهم دة اهم شئ اهم شئ انحنا بنقوله فى حركة تحرير السودان ودى النقاط الحاولت وحبيت أن اشرح لهم.
*هل حان الان وقت لتحقيق السلام الشامل فى دارفور وكيف يمكن ذالك؟
_ تحيق السلام يتم بتغير نظام المؤتمر الوطنى وتسليم المجرمين البواصلو الابادة بقيادة البشير الى محكمة الجنايات الدولية هذا هو السلام الذى ننشده ودة بختلف مع سلام المناصب الببقى فى المنابر البتشوفهم ديل اذن شعب دارفور اذا عايزين السلام عليهم أن يخرجوا كلهم ويحتلو عواصم الولايات لأن دة حكوماتهم ما حكومات المؤتمر الوطنى اذن السلام نجيبو نحن بقوة وارادة الشعب فى السودان وايضا الناس فى الخرطوم يطلعو ويحتلو القصر الجمهورى والناس فى بورتسودان يحتلو مكان الحكومة وايضا فى كل مدن السودان وجيش حركة تحرير السودان متحرك والجيش هم بيعرفو يحتلو كيف ولايحتاج الحديث فى التلفون او فى الاذاعة لكن الشعب لابد أن نخاطبهم بهذا الوضوح لأن المعركة اصبحت معركة مفتوحة ومكتوبة اى زول بيعرفه انحن كدة نغير هذا النظام بقوة وارادة الشعب السودانى.
*الكل يتابع أن هناك تفاوض فى الدوحة اذا تم اتفاق سلام وانتم ليس طرفا فيها هل ستوقعون عليها كملاحق كما تم سابقا فى ابوجا؟
_ انت كما تعلم انو نحن رفضنا نوقع اتفاقية ابوجا وحينها العالم كله كان فى جهة وانحنا وحدنا فى حركة تحرير السودان كنا فى جهة وقلنا مافى سلام وما ممكن يتم الا بتغير هذا النظام لأن لا يمكن أن نوفر الامن لشعبنا بوجود المؤتمر الوطنى فى السلطة كلامنا دة بعد 4 سنوات او 5 سنوات من اليوم الان كل الشعب فى السودان عرف انو وينو ابوجا زاتو؟ وينو الناس وقعو على ابوجا؟ وينو الاتفاقيات التم فى ليبيا وفى غيرها؟وايضا فى الدوحة, المؤتمر الوطنى بيدى الناس 24 ساعة عشان يتم فأذن يأخى البيجرى فى الدوحة وفى غير الدوحة اذا كان سلام للمناصب جيد اى زول داير منصب خلى يدو لكن سلام الناس فى الارض دة ماموجو دة الا ببقى بتغير النظام دة.
*طيب انتم فى حركة تحرير السودان ماهو البديل المناسب للدوحة؟
_ البديل المناسب اولا خروج الشعب لاسقاط او تغير نظام المؤتمر الوطنى, المجرمين يمشو المحكمة , البديل ان الشعب هما يحكومو نفوسهم , الناس يكون أمن لنفوسهم فى قراهم قرية بقرية منطقة بمنطقة حاكورة بحاكورة والناس يعطوا تعويضات من خزينة الدولة فردية وجماعية يكون فى اعتزار رسمى من الدولة لناس دارفور المارسوا فيهم الابادة عشان يخلق الجو الملائم عشان الناس تتصافى بيناتهم ونرجعو نعيشو زى الزمان مثل ما عاشو اجدادنا عاشوا فى سلام وطمأنية هذا اذا بختص بدارفورأما انحنا كحركة تحرير السودان كما دارفور قضية الشعب انحنا ايضا مسؤلين من الشعب السودانى انو الناس العملوا الانقلاب وكتلوا ملايين فى جنوب السودانى وفى النيل الازرق وفى جبال النوبة وعملوا التطهير الخدمى فى الصالح العام وشردوا الاسر وغيرو قيم الشعب السودانى للحوجة. الناس نجيبوهم نحاكمهم والمطلوب دوليا نسلمه للمحكمة الدولية والمطلوب محليا نقدم للعدالة عشان يتحاكم ومافى مجرم يطلق ولناس المؤتمر الوطنى ديل نجى نجرد اموالهم لأن اموال الشعب ونرجعوا للشعب ونصلح اقتصاد البلد ونصلح التعليم والصحة لأن قروش البلد بدل ما يمشى لجهاز الامن بملايين والجبهة الاسلامية ولاسرهم ويكون هم مستمتعين بقروش الشعب ببترول الشعب بمال الشعب بضرائب الشعب بجمارك الشعب بعطاءت الشعب, الحاجة دة يعود للشعب عشان يحسن لهم معيشته فى اكله وشرابه ونحسن لهم التعليم والصحة لأن الان مافى زول بتعالج الا بقروش والقروش الا فى جيوب الجبهة الاسلامية النهوبوه من الشعب السودانى القروش دة يرجع لخزينة الدولة عشان يخدم الشعب وهذا هو الدعوة البدعو بيه حركة تحرير السودانى للشعب السودانى وهذه هى خطتنا وبعدين نجى نعمل انتخابات حرة ونزيهة والشعب يجيب حكومتهم.
*الاستاذ عبدالواحد الان كيف تقرأ المشهد السياسى فى السودان بعد انفصال الجنوب فى التاسع من يوليو القادم؟
_ المشهد السياسى هو القرأة التالية, اولا انحنا فى حركة تحرير السودان نعترف بدولة الجنوب ونحى اخوانا فى الحركة الشعبية بأنو دة خيار الشعب لجنوب السودان واننا نريد أن نعيش معهم فى حسن الجوار فى الامن بسلام وفى الاستقرار وتبادل المنافع وقف مصلحة الشعبين فى دولة السودان الجنوبى ودولة السودان الشمالى أما فى دولة السودان الشمالى انحنا كحركة تحرير السودان البننتمنى ليها ودايرين نقودها دايرين اول حاجة نغير المؤتمر الوطنى الليلة وما بكرة عشان نوفر الامن للناس كلهم فى السودان وفى دارفور اولا وثانيا نطلق كل الحريات, حرية التعبير حرية السفر حرية الانتماء حرية الدين كل الحريات المنصوص عليها فى مجلس الامن او فى قانون حقوق الانسان كل الحقوق الاساسية لحق الانسان فى العيش والتعبير والكرامة فى الصحة وكل الاشياء هذه ولا نريد أن يتكرر فى الدولة الابادة ,دة برنامجنا فى الحركة. المشهد السياسى ان لا سودان بوجود المؤتمر الوطنى اذن الحل الوحيد هو تغير المؤتمر الوطنى وبناء دولة المواطنة فى شمال السودان عشان الشعب فى الشمال والجنوب ينعم بالسلام وايضا القبائل الموجودة فى الحدود الذين تريد حكومة المؤتمر الوطنى أن يمارسهم عبادة جديدة بأستخدام وقود حرب بين دولة السودان الشمالى والجنوبى ونحن لا نريد أن نسمح لهذا ونريد العيش بين الدولتين فى سلام واعتقد أن هذا هو الحل الوحيد وليس الحل هو الحرب كما يعمل المؤتمر الوطنى الادى الجنوب الى الانفصال ويريدون التواصل فى الحرب عشان دارفور ينفصل عشان النيل الازرق وجبال النوبة وشرق السودان والشمالى الاقصى وكردفان كلهم ينفصلوا وهما يحكوموا شبر من السودان ودة ما نسمح لهيم لأننا حريصون لوحدة السودان الشمالى ودة لا يمكن أن يكون بوجود المؤتمر الوطنى.
*فى الشهور الاخيرة تصاعدت العمليات العسكرية فى دارفور وانتم طالبتم من المجتمع الدولى بفرض حظر جوى على دارفور لكن الخبراء القانونيون قالوا أن حظر الطيران يتطلب قرارات من مجلس الامن الدولى مثل ما تم فى ليبيا ألان ما هى الاجرات التى تقوم بها حركتكم مع مجلس الامن بهذا الشأن؟
_ انت بتعرف بأننى فى شهر نوفمبر الماضى من 2010 أنا وصلت فى افريقيا وقمت بجولات كركوكية لدول مجلس الامن الدولى وصلت كل هذه الدولى وقعدت مع اعضاء مجلس الامن الدولى فى مناطق مختلفة ونلتقى معهم فى مناطق مختلفة واعتقد أن قرار حظر الطيران سيكون قريب جدا وانحنا يوم من الايام قلنا أن اى زول كتل ناس فى دارفور لابد انو يتعرض للمحاكمة الوقت داك كان اكثر الناس يعتبروننا مجانين واليوم البشير نفسه مطلوب فى محكمة الجنايات الدولية وما قادر يسافر الا فى دول محددة ولما يسافر يده بخت فى قلبه, أنا اقول ليكم قرار حظر الطيران حيكون قريب جدا أما تصاعد العمليات العسكرية بعود الى أن حركة تحرير السودان فى البداية الجديدة دايرين نوحد كل شعبنا فى دارفور ونوحد حركة تحرير السودان أما بالوحدة التامة العودة الى الحركة او بالتحالف ودة انت شفت عملياتنا العسكرية فى الارض نجح بأمتياز بقيادة الاخ قدورة وطرادة وبقية الاخوة المناضلين فى الارض ودة أن دل يدل على أن حركة تحرير السودان فى البداية الجديدة وحدة الجيش كما يوحد الشعب واعتقد اننا الان فى الاتجاة الصحيح وسيكون الانتصار قريبا جدا.
*الحكومة تريد أن تجرى استفتاء على اهل دارفور حول مسألة الاقليم ماهو موقفكم من هذه العملية؟
_ المؤتمر الوطنى حكومة فاقد الشرعية واى حاجة بتعمل بيه انحنا من جانبنا ما معترف بيها فأنحنا ما بنعترف بالمؤتمر الوطنى فكيف نقبل بالاستفتاء فأنا بقول لشعب دارفور دة اوهام المؤتمر الوطنى زول ابادك وبقتلك وببيدك وبعتبرك مواطن من الدرجة14 وبزور الانتخابات كيف يستفتاك دة كلام فارغ ونقول للشعب السودانى فى دارفور دة موضوع مرفوض جملة وتفصيلا وحتى انحنا من شدة ما بعنينا ما قايدين نرد ليه لأننا نفكر فى تغير المؤتمر الوطنى ونخلق حكومة بديلة للمؤتمر الوطنى يؤمن بحق الشعب السودانى فى الحياة ويعيش ما بعض.
*سؤال قبل الاخير اذا فشل كل الجهود لحتقيق سلام دارفور ماذا سيكون مستقبل اقليم دارفور؟
_اولا الشعب تبعا يقرراقليم دارفور لكن انحنا فى حركة تحرير السودان خيارنا هو كلنا نحارب هذه الحكومة عسكريا وشعبيا بالانتفاضة عشان نغير ونعمل سلام, لايمكن يكون فى سلام فى دارفور بوجود المؤتمر الوطنى انا عارف انت تقول لى حق تقرير المصير حق تقرير المصير دة حق بتاع اى شعب لكن انحنا فى حركة تحرير السودان نشوف انو اهل دارفور هم الخلقوا السودان وموجودين فى اى مكان فى السودان ومصلحة اهل دارفور بوحدة السودان لكن كمان ناس دارفور لو اختاروا الانفصال ودة كمان انحنا مابنجير زول , لكن دعوتنا كحركة تحرير السودان انو ناس دارفور يكونوا موحدين مع بقية الشمال ويحكموا الشمال لأنهم اغلبية واصحاب حق ومواطنين اصيلين وحان الوقت كمان ناس دارفور يحكموا السودان ويدوا نموزج لحكم السودان الشمالى هذا طرحنا وهذا هو فهمنا.
*اخيرا هناك مزاعم تفيد بأن فرنسا طرد رئيس حركة تحرير السودان عبدالواحد نور فى وقت سابق بسبب أن رئيس الحركة رفض أن توفى بألتزاماته بالذهاب الى الدوحة ومصادر دبلوماسية تقول أن فرنسا لديها تأكيدات بأن الخارطة السياسية للمجتمع الدولى تقول أن هناك عقوبات تفرض على الذى يعرقل عملية السلام فى دارفور كيف ترد؟
_ دة تبعا تفكير بتاع عقلية المؤتمر الوطنى(طردو) فرنسا دولة ديمقراطية وامشى شوف دستوره ما بقدر بطرد زول بالذات البحارب من اجل الحرية والديمقراطية لأن بتنافى مع قانون ودستور الدولة الفرنسية واقول لأى زول بقول كلام زى يمشى يشوف دستور وقانون الدولة الفرنسية مابطردو الناس فدة كلام ما صحيح (كذب) لكن دة بصوره عقلية المؤتمر الوطنى لأن الزول الاختلف معهم أما كتله أما طرده.أما عقوبات والله أنا يعنى اذا فى عقوبات لى انا بكون فخور جدا لأن فى عقوبات للمجرمين وفى عقوبات للمناضلين بألطبع احنا ما مجرمين مناضلين لكن المؤسف انو دة كله كلام بتاع المؤتمر الوطنى من ابوجاء لحدى الليلة بقولوا لينا عقوبات وينو عقوباتهم دة ما يدونا؟ نحنا مناضلين ودة كفاية جدا انو الشعب السودانى فى كل مدن السودان خرج مظاهرة,حركة عندها جماهير زى دة يدو عقوبات كيف زاتو؟ فدة اوهام بتاع عقلية المؤتمر الوطنى لأنهم مجرمين وأبادو الشعب السودانى بفرضو عقوبات ليهم لأن فعلا عندهم جرائم. اما انحنا حركة تحرير السودان اول حاجة أنا محامى وبعرف العقوبة بفرضو لمن فأنحنا مش مجرمين عشان يفرضو لينا عقوبات انحنا مناضلين عشان يساعدونا نغير بلدنا وهذا ما نعمله مع المجتمع الدولى الان.
*كلمة اخيرة ماذا تقول للشعب فى دارفور والسودانى بصفة عامة؟
_بناشدهم لمواصلة مصير النضال لتغير المؤتمر الوطنى وهذه المظاهرات تانى ما يقيف وجيش حركة تحرير السودان اتحركو عشان يستلمو السلطة ويحمو الشعب ونخلق دولة المواطنة المتساوية فى شمال السودان والفصل الواضح للدين من الدولة.اشكرك جدا وتحياتى عبرك لكل جماهير الشعب السودانى وينسو خلافاتهم الحوبية وكلهم يسمو لمصلحة الشعب السودانى للغير اولا للمؤتمر الوطنى وبعدين الناس كلهم نجى نحتكم من الذى يختاره الشعب اشكركم مرة ثانية واشكرك انت لهذا لهذا اللقاء والحوار المطول شكرا.
[email protected]
[email protected]