المفيد المختصر لإسقاط حكم العسكر

المفيد المختصر لإسقاط حكم العسكر
في البدء التحية للقراء  الكرام الذين غيبتنا عنهم الظروف لمدة من الزمن , و تقبلوا اعتذارى
يعود قلمنا المتواضع للكتابة مجددا و فى كل ركن من ارض وطننا الحبيب الاف المصائب و الكوارث التى جلبتها الدكتاتورية العسكرية التى فرضت نفسها بالدبابة قبل ثلاث و عشرون عاما ( سنين عجاف )  و ايضا لا يخلو اي بيت فى ارض المليون ميل ( معليش بقت كيلومترات ) من الاثار الكارثية التى جلبتها تلك الدبابة مسنودة بالذقون المزيفة , ليلة الثلاثين من يونيو المشؤوم .. بيت سودانى يعانى من الفقر , و اخر يعانى من فقدان الاب و الاخ بدعاوي الجهاد الكاذبة .. بيت اخر يعانى من إنفصال الارض الحبيت إلى إثنين … بيت تانى يعانى من ويلات حرب كردفان او دارفور او النيل الازرق … و بيت اخر يعانى من التهجير فى اقصى الشمال … بيت اخر يعانى الغلاء الفاحش فى كل السلع  و التضخم  الغير مبرر فى دولة تنتج اغلى الصادرات العالمية !!
و عادت الصفوف بكثرة كمان … صف البنزين  و صف السكر … صف اللحمة المدعومة … صف الدخن الهندي … صف الجنسية … صف الرقم الوطني … و هي صفوف يمكن تلافيها بابسط الحلول
جيشنا ارهق بالحروب  طول مدة اصحاب الذقون الملعونة (ثلاثة و عشرون سنة ) فاصبح جيشا مرهقا يهزمه جيش دولة تم إنشاؤها قبل ستة اشهر …

التعليم  فى هاوية عميقة لم يستطع خبراء وزارة التربية  إنقاذها منه منذ مداولاتهم العام الفائت ..
الصحة : ادخل اقرب مستشفى عام ( الجواب يكفيك عنوانو )
الاسلام : مرمطوها  و شنو سمعتها  و جعلوها طاردة  للذين كنا نامل ان نراهم يوما اخوة لنا فى الدين
السيادة الوطنية : لو عندنا سيادة  ما كان حبش احتلوا بلدنا
طيب الحل شنو ؟  بس اي واحد مننا لازم يقعد مع نفسو و يجاوب على السؤال ده … انا غايتو مقتنع إننا لو ما لحقنا البلد دي حتروح فى داهية … نلحقو كيف ؟ نسقط الحكومة دي بلاش عسكر بلاش مشير … و كمان بلاش احزاب …. كلنا سودانيين
اي واحد يبدا يعمل الهو بقدر عليهو … لا يكلف الله نفسا إلا وسعها …. قادر تكتب فى الحيطة كلمة ( يسقط الحكومة) اكتب … قادر تتظاهر جوه الحي إتظاهر … قادر تخاطب الناس فى اي محل خاطبهم … قادر تكتب عن فساد الحكومة اكتب … قادر تعمل جلسات تنويرية  للشباب فى الحي اعمل … قادر تشخبط صور الدكتاتور المعلقة فى الشوارع شخبط … بس إنت تقدر ل شنو ؟  اعملها توااالي ما تنتظر حد … طيب لو واحد كتب فى سور المدرسة يسقط حكم العسكر … كل المارة بكون قروها .. و بكون واحد اتنين عجبهم الجملة يمشو بكرة يكتبوها … كدا بكون كل اسوار البلد يسقط حكم العسكر …. و كل الناس تبدا تقراها فى اي لفة بعد شوية ببقى جملة عامة … و الثورة تبقى شئ عادي
و حتى ناس المؤتمر الوطني نقول ليهم , المؤتمر الوطني فيهو رجال كتاااااار , مافي داعي زول واحد يبقى رئيس الحزب و رئيس الدولة لربع قرن , و فى ناس مؤهلين اكتر بكثير من العسكري العوير ده … في البروفات و في دكاترة , و في عساكر اشطر من زولكم ده … و زاتو التداول السلمي للسلطة وين ؟ لمن زول واحد مكنكش فى الكرسي لثلاثة و عشرون سنة !!  ده السبب  الوحيد خلى قذافى يفقد سلطته فى برهة …. و حسنى مبارك قعد للمصريين ثلاثين سنة و الناس فقدت الامل فى التغيير شان كده ثارت على حكمه …. و هو وين ؟ ضيع نفسو و ضيع الحزب الوطنى معاهو ….  و لو خليتو الوهم دا والله يضيع نفسو و يضيعكم معاهو … احسن تلحقو زولكم دا بدري بدري … اقله تكونوا جزء من ثورة الشعب ضد العسكر و تضمنوا  بقاء المؤتمر الوطني كحزب سياسي ينافس وفقا لجمهوره  فى إنتخابات ما بعد الثورة .
و من ثوابت الكون ان التغيير حتمى لانها سنة الله فى الارض , فاين فرعون ؟ و اين مملكة سبا ؟ و اين قذافى ؟ اين صدام ؟ اين حسني مبارك ؟  فلا بقاء إلا لله …. و البشير سيزول عن كرسي الحكم مهما طال بقاؤه فيها … كلها ايام معدودات من عند العلي العظيم … و وعد الله انه سيستخلف الذين استضعفوا فى الارض فانظروا خريطة السودان جيدا من الذي استضعف فيه ؟  سيجعلهم الله الوارثون
دعوتى لكل سودانى ان يساهم بما استطاع لاصلاح حال البلد دون انانية تجاه حزبه او فكره السياسي … فاذا إنصلح حال التعليم فاولادنا هم المستفيدون جميعا دون تمييز … و إذا استطعنا ان نثبت دستورا يضمن حقوقنا كافة فكلنا (شيوعيا , اسلاميا , علمانيا , سلفيا , وسطيا , اتحاديا , ناصريا , قوميا , إشتراكيا , حزب امة , مواطنا عاديا ) سنستفيد من تلك الدستور فى ممارسة حياتنا و معاملة بعضنا الاخر فيا اخوتي دعونا نبدا …. انا بديت كتبت هنا و بكتب فى حيطة بيتنا ( تسقط حكم العسكر) … و بعد المغرب بشيل بوهية و بكتب فى الحيطة بتاع المدرسة ( تسقط حكم العسكر ) ( يسقط الدكتاتور )
و اي صورة للبشير بشوفو قدامي بعمل فيها علامة كروس بالاحمر … انا بقدر بعمل ديل لوحدي
و لو لقيت شباب فى الركن بتكلم معاهم عن الصفوف … و كيف بلد منتجة للبترول الناس تقيف صف بنزين ؟ فى حاجة غلط … و الغلط الحكومة دي … و اكبر غلط فى الحكومة دي العسكري الامي ده … ما ناقش حاجة و كمان سبهلل سااااكت … فالح فى الحليفة و الرقيص …. و السودان اكبر بلد زراعي يستورد الدخن من الهند ؟ فى حاجة غلط …. و الغلط ياهو البشير ده  …. يا جماعة انا كده قصرت ؟
اها إنتو بتقدرو على شنو ؟؟؟؟؟؟؟؟ يلا وررووووووونا ….. و الشعب يريد إسقاط المشير
[email protected]