المؤتمر العام لحركة العدل والمساواة ينعى شاعر الشعب / محجوب شريف
ينعى المؤتمر العام لحركة العدل والمساواة السودانية شاعر السودان الذى غيبه الموت ،، الموت الحقيقه كما وصفه هو نفسه فى شعره الخالد ،، رحل عنا ( محجوب شريف) ،، ولد (مريم) ،، التى انجبت هذا الانسان العظيم الجميل ،، المغرد دوما بحب السودان ،، الوطن ،، القضية ،، المغرد دوما بحب الغلابة ،، وقضايا الكادحين ،، وما لانت عزيمته للسجون والمعتقلات ،، ولم يهاود فى القضية.
سنقرا ادبك من جديد ،، وسوف نرد بضاعتك اليك ،، ونزيدك كيل بعير ،، فانت القايل:
يابا مع السلامه
يا سكة سلامة
فى الحزن المطير
ياكل النخلة هامة
قامة وابتسامة
هيبة مع البساطة
ان هذا الوصف الجميل يا محجوب ينطبق عليك ،، فكل الفضايل التى وصفت بها الشعب السودانى،، ووصفت بها السودان هى منطبقة عليك فى المقام الاول ،، لانك انت المحنك ،، ولسان الشعب ،، وضمير الشعب ،، لهذا احبك الشعب السودانى وبكى لفراقك ،، رغم علمه بانك ستبقى خالدا ،، باناشيدك المكتوبة ،، والملحنة ،، والمغناة على امتداد وادى النيل ،، من نملى القديمة حتى رشيد ودمياط.
حب الشعب السودانى لك يا محجوب هو الطاقة التى مددت عمرك ،، كما وكيفا ،، و طولا وعرضا ،، وانت كنت تنعى نفسك ،، و كنت تقرا احاسيسنا ،، وتعبر بلسانا اليوم ،، عندما نقول ،، اليوم ،، الموت سرق مننا حبيبنا محجوب شريف ،، وذلك حين قلت :
حب الناس درقتو
يا موت لو تركته
منا قد سرقتو
لكنك حقيقة
نعم ،، الموت حقيقة ،، يا محجوب شريف ،، حب الناس ،، لك ،، يا محجوب كان درقة ليك ،، وسيظل ،، فى الدنيا والاخرة ،،
وسوف تجد قدامك ،، ما سلفت يداك ،، من عطاء للشعب ،، و لى ( وليد دارفور) ،، عقد الحوالة الموثق من مستحقاتك لدى الفنان محمد منير ،، التى حولتها لصندوق ( وليد دارفور) ،، وانا شاهد عليه ،، تلقاه قدامك ،، تلقاه مكتوب ،، وسوف يظل خالدا فى وجدان انسان السودان ،، وانسان دارفور ،، فانت انسان بحق ،، انت القضية تمشى على قدمين .
عزاء حركة العدل والمساواة السودانية موصول لاسرة محجوب شريف المباشرة ،، وللرفاق فى الحزب الشيوعى السودانى ،، خاصة لجيل البطولات ،، وجيل التضحيات من اصحاب البطانيات الجاهزة لاستقبال زوار الفجر ،، والعزاء لاصدقاء فقيد الوطن فى كل ارجاء المعمورة ،، وخاصة فى كاردف ،، وفى الدوحة التى ظل المرحوم يتردد عليها ،، وقد اكرم السودانيون بالدوحة انفسهم حين بادروا بتكريمه فى حياته ،، والعزاء موصول لشباب انتفاضة سبتمبر ،، الذين يلهمهم محجوب شريف ،، بذاته ،، و بشعره لتقديم التصحيات من اجل الوطن القضية .
،، تقبل الله فقيد الوطن ،، وشاعر السودان محجوب شريف ،، رحمه الله
ابوبكر القاضى
رييس المؤتمر العام
لحركة العدل والمساواة السودانية
٢ ابريل ٢٠١٤