مرثية للدكتور خليل ابن دارفور النبيل
للشاعر / عبدو الجندي
في القلوب مثواك أنت
يا ابن دارفور الأصيل
ما رضيت الدنيا خنت
كنت للناس الدليل
يا الجميل في كل صفاتك
لاكا غدار أو رذيل
تكرم الواقفين ببابك
ماك أناني ولا بخيل
انت ما بتموت وحاتك
أنت موجود يا خليل
البموت في كل مرة
هو الذليل
الرضا العيش الحرام
تحت أقدام اللئام
راسو مدفون في التراب
ذي النعام
انت أرفع يا خليل
انت الشجاع
انت الحسام
تقطع رقبة المستبد
ود الحرام
ما بتخاف صوت المدافع
انت ما بتخشى الصدام
دخلت لأمدرمان ضحى
قبل الضلام
ما جيتا متستر بليل
والناس نيام
دكيت حصون المفترين
سقيتهم الموت الزؤام
ما اعتديت ضريت برئ
ما سعيت للانتقام
صنت النفوس
انت الهمام
بالسيف تجيب لينا السلام
سلام حقيقة
مش كلام
ينصف المظلوم هناك
المعّذب بالدوام
المشرد في الخلا
ذي الهوام
يا نصير المستضعفين
يا سليل بيت الكرام
كنت الوفي وكنت الأمين
ما بعت اهلك بالحطام
انت نور السالكين
بدر التمام
يجزيك رب العالمين
يوم القيام
وتكون في دار الخالدين
دار السلام
آمين …
