كرهتونا السودان يا طه عملتوا لينا وجع وش يا طه
عزيزي القارئ في البدء أستميحكم عُُذراً لأن أكتب بالدارجية السودانية لكي أتنفس عما بداخلي تجاه الجماعه ديل
خربتوا بيتنا يا طه فصلتوا جنوبنا يا طه كرهتونا النوم يا طه ، جهجهتونا يا طه ، خربتوا اولادنا وتعليمهم يا طه ، دخلتوا المخدرات لدور التعليم يا طه .
نعم والله كرهتونا السودان يا طه ، عملتوا لينا وجع وش يا طه ، جاتنا حالات نفسية بسببكم يا طه ، فلستونا يا طه ، هريتونا بالضرائب يا طه ما خليتوا في جيبنا جنيه يا طه ، شتتوا أفكارنا يا طه ، خربتوا بيوتنا يا طه ، الله لا كسبكم يا طه ، قوموا إتخارجوا من حياتنا يا طه ، كرهتونا أي حاجه إسمها حكومة إسلامية
يا طه ، دستورك ده موصوا وأشرب مويتوا يا طه ، واحد وعشرين سنه خارج السودان بسببكم يا طه ، الله لا بارك فيكم يا طه ، نعم والله كرهتونا السودان يا طه ، عملتوا لينا وجع وش يا طه ، لامن نشوفكم بقت تجينا حالة نفسية يا طه ، الله يرحم والدينكم قوموا إتفكفكوا وإتجارخوا مننا يا طه ، شيلوا معاكم مشاريعكم وإنجازاتكم بس خلونا في حالنا وفكونا منكم يا طه ، والله عيب عليكم إختشوا شويه يا طه ، خلو عندكم شوية دم يا طه ، ماممكن يا طه !! دمرتوا البلد يا طه ! قسمتوا البلد يا طه ! خليني أذكركم يا طه لو إنتوا بتنسوا إحنا ما بنسى يا طه ! زماااان يوم جيتوا قولتوا البلد كان أخدها الكلب مافي زول بيقول ليهو جر ! الليلة إنتوا لو أديتوا البلد للكلب ذاتوا حيقول ليكم إفييي !!! ما دايرها بلد عفنتوها بالفساد وبنيتوا ليكم فيلل ومجمعات سكنية فارهة و شركات وعمارات ياخي ريحتكم ضربت يا طه ! بلد مُقسمه زي الدُلقان ! بلد شعبها بقى زي الأرقوز وبينضرب بالجزمة في لبنان وبيتحرق بالنار في ميدان مصطفى محمود القاهري
بلد بقت مصر فينا زي إيران في العراق تقول ليكم سو كده وما تسوا كده بلد منهوبه نهاراً جهاراً وعينك يا تاجر !! بالله يا طه أهنتونا وذليتونا وإحتقرتونا وعذبتونا ما خليتوا لينا كلام نقولوا في حقكم يوم القيامة فإتقوا الله وإتفكفكوا مِننا ! لكن أقول ليك حاجه يا طه ! ؟ نِحن بنستاهل يا طه ! لأنوا قلوبنا ميته وما قادرين نقول
ليكم قوموا إتخارجوا
يا طه
عبد الله بن عُبيد الله
إنديانا
الولايات المتحدة الأمريكية