شبكة حجر قدّوْه للمعلومات في سلسلة فضائح وطرائف عصابة النظام

شبكة حجر قدّوْه للمعلومات  في سلسلة فضائح وطرائف عصابة النظام

H.G Network

عبدالحميد إبراهيم – أمريكيا –الخرطوم “دهاليز المؤتمر الوطني”

سرايا عوض الجاز – عالم من الخيال (البابور جاز خلي يشتغل)

الشبح الجاز .. غيتو إسم علي مسمي .. ده بالع ليهوover nine” billion $$” قالوا التيس عمر البشير قالوا ؟؟

زاوية شيخ الطريقة بنك علي “ستايل” عالي .. والحجز بعد السلام عليكم والتقسيمات بعد عبور السرداب .. يمين في شمال وتوووش تلاقي صراف قدامك وكمان رابط كرافته

حجر قدّوْه الليلة في كلام بره بره .. يعني في الفضاية عديييل كِدَه .. والرهيفة التِنقْدْ

ود البلد الأغبش المدعو (س.ع) مقاول وماسك ليهو كم بيت لزوم البناء والتشطيب .. واحد من البيوت “سطوح” حلم الفتي إبراهيم نايل إيدام .. وكان يا مكان و صاحبنا ود إيدام فاَرِّكْ عكس الهواء وجيبو نِشفان خلاص والمقاول زانقو وكتّمُو النفس وكلو في تلاتين مليون بس .. وساكيهو تحت تهديد لملمة العِدْة والإرتحال إلي شغل تاني واللعب في المضون أحسن من الجهجهة ساكت والسطوح لسع ماوصل العتب .. ود نايل إيدام فكر وتدبر وتوكل .. كع كرع كععع دفس ورفس غيتو ود إيدام طَلَعْ ليهو بتصديق من الأمير المفدّي ود الجاز “شيخ التقسيمات” .. تلاتين مليون بتوقيع الأمير ناقصاها تأشيرة الخروج و“التيك أوف” “ويادار مادخلك شر” .. ود البلد إستلم الصك وكمان معاهو شروط .. أولاً تأشيرة الخروج تكون بعد صلاة الفجر .. ثانياً المكان زاوية الغفران الملحقة بسرايا البابور جاز .. والإستلام عداً نقداً .. بس السكن بعيد .. أمدرمان لهناك مشوار يهد الحيل .. بس كلو يهون في سبيل الضّحَاكَاتْ .. زاوية عمرانة .. والصلاة حضورها يغطي عين الشمس .. تحضيرات خمسة نجوم “خشوع وخنوع وشوية دموع وكلو في سبيل الله” ماقالوا القيامة كان قامت عندنا رصيد “أقوال مأثورة من عند نافع” .. قولَتْ السلام عليكم كِدَه ود البلد تِبْ تِرِّبْ وقف علي طولو والوريقة في إيدو اليمين .. أتاري الشئ في سبيل الله قمنا نبتغي رفع اللواء ساكت .. مازولك في الصف بقدرة قادر بقي الطيش في العشرين الأوائل .. وفي واحد كرشو تطقطق بقي للجماعة بوليس حركة لزوم النظام وعدم التخطي والتخريمة الجنباوي “حِتِة نظرة لو سمحت ظروفك للصف المرفق أعلاه” .. “برجاك برجاك يابْشَرّه .. والكل يدندن” .. غيتو جنس مِحَنْ .. والأمير المفدي وِلْدَى للجاز في قيام جالساً .. يتفحص صحة الوثائق وبِهَزّةْ رأس تعني الأوكي .. والمطلوب بس “عبور السرداب .. يمين في شمال وتوووش تلاقي صرّاف قِدَامَكْ وكمان رابط ليهو كرافته” .. أخينا لقي ليهو واحد يخلق من الشبه أربعين بس الخالق الناطق سَنْجَكْ بنك أمدرمان الوطني .. أبوكرفته إستلم وشال ولملم الصك المؤشر لزوم “التيك أوف” .. ههه “نهدة” تلاتين ملـ .. (كَبْ كَرّبْ شَكْ) زولك كرفس الصك وفيووو في سَبَت الوّساخه المتندل بالصكوك !!؟؟

أخينا قبض .. وغيرو قبض والقِدامو والوراهو قبضوا .. وفي سره كده بس ود البلد قال “الشئ المحرقني إنو مافيش ريكورد “سِجِل” .. كلام الجماعة طلع صاحّ وما فوقو عوجة تَبْ ” ود الجاز ده مجاهد و سادي ثغرة وكلو في سبيل الله .. ولا لدنيا قد عملنا نحن للدين فداء” ونواصل!!